Државното средно училиште за образование и рехабитација „Искра„ - Штип започнува да работи како Центар „Искра“. Центарот „Искра“ е основан со Одлука на Собранието на општина Штип број 0201-3212/1 до 01.10.1979 г., како Организација на здружен труд „Центар за работно оспособување на умерено и лесно ментално ретардирани младинци“ за подрачјето на Источна Македонија и за нивно успешно вклучување во организиран систем на професионална рехабилитација и социјализација.

Во учебната 1981/82г. Центарот започнал со работа, во ноември 1982 г. е поднесено Барање за верификација на воспитно образовната работа на Центарот за работно оспособување на ласно ментално ретардирани младинци „Искра“ Штип. Врз основа на Законот за средно образование и воспитание, член 98 „Сл.весник„ на СРМ бр.25/79, Републичкиот комитет за образование и наука донесува Решение за прва верификација на Центарот, под арх.бр. 1907/1-82 од 18.01.1983г. на воспитно-образовната дејност за оспособување на кадри со I и II степен на стручна подготовка за занимањата: картонажер-книгоповрзувач од графичка струка, производство на оранжериско-градинарско производство од земјоделска струка, конфекционер (подоцна се преименува во шивач на облека) од текстилна струка и бравар од металска (подоцна – машинска) струка за младинци лесно попречени во психичкиот развиток.

.....Искра денес...

Државното средно училиште за образование и рехабилитација „Искра“, денес има современа и ефикасна настава прилагодена на индивидуалните способности на секој ученик и квалитетни услови во ученичкиот дом за сместување и реализација за воспитната работа.

Училиштето и ученичкиот дом располагаат со најнова компјутерска технологија и опрема која ја олеснува наставата и престојот на учениците. Има обезбедено поголем број на телевизори, компјутери, печатачи, интерактивни табли и слободен пристап до интернет. За полесно движење на учениците со физички хендикеп во училиштето има пристапни рампи.

Училишниот двор се надоградува и надополнува со декоративни дрвја и хортикултурно уредување, летниковци за одмор и спортски справи за рекреација. За безбедноста на учениците да биде на поголемо ниво училиштето е под постојан видео надзор, а до видео снимиките пристап има овластено лице.

Целиот воспитно - образовен кадар во училиштето составен од наставници, воспитувачи и стручна служба дава мултидисциплинарна поддршка на учениците, грижејќи се за нивното образование, воспитание, физичко и ментално здравје.

Во училиштето се планираат и воннаставни активности со цел на учениците да им се даде можност за активен ученички живот, зголемување на интересите и способностите за развивање на морално, културно, естетско чувство. Содржините на воннаставните активности се планираат од претстојните државни и верски празници и од потербите на учениците, за да развијат социјални вештини и добри навики кај нив. Учениците учествуваат на различни културни, забавни и спортски активности како што се: фолклорниот фестивал „Фатени за раце го менуваме светот“, Регионални игри во организација на Федерација на училишен спорт на Македонија, ликовен конкурс во организација на општината и слично. Седум ученички од ДСУ “Искра“ - Штип во учебната 2022/23 година учествуваа на Специјалната Олимпијада која се одржа од 17.06 до 21.06.23г во Берлин, Република Германија.